ዶ/ር ቴዎድሮስ የአለም ጤና ድርጅት ዳይሬክተር በመሆን ተመርጠዋል?

ሐሰት፡ ዶ/ር ቴዎድሮስ የአለም ጤና ድርጅትን ለመምራት ለሁለተኛ ጊዜ መመረጣቸው አልተረጋገጠም

የአለም ጤና ድርጅት ዋና ዳይሬክተር ምርጫ በመጪው ግንቦት ወር ይካሄዳል

ከታች በምስሉ እንደሚታየው “Digital Woyane ድጅታል ወያነ” የተባለ ከ 170ሺ በላይ ተከታዮች ያሉት የፌስቡክ ገጽ በሰበር ዜና “ዶ/ር ቴዎድሮስ አድሃኖም ለሁለተኛ ጊዜ የአለም ጤና ድርጅት ዳይሬክተር ሆነው ተመርጠዋል” የሚል መረጃን አጋርቷል።

አዲስ ሚዲያ ከኮድ ፎር አፍሪካ ጋር በመተባበር በሃቅ ማንጠሪያ ክፍሉ በኩል ባደረገው የማጣራት ስራ መረጃውን ሐሰት መሆኑን አረጋግጧል።

ከታች በምስሉ የሚታየው የአለም ጤና ድርጅት መረጃ እንደሚያረጋግጠው ከሆነ የተቋሙ ዳይሬክተርነት ሹመት ሂደት ገና አልተጠናቀቀም። ሹመቱ የሚከናወነው ግንቦት 14 ቀን 2014 ዓ.ም (በጎርጎሮሲያኑ የዘመን አቆጣጠር May 22, 2022) ነው።

በፈረንጆቹ ግንቦት ወር 2017 የአለም ጤና ድርጅት ዋና ዳይሬክተር በመሆን የተመረጡት ዶ/ር ቴዎድሮስ ለሁለተኛ ዙር እንደሚወዳደሩ ይፋ ባያደርጉም ፥ ጀርመን ግለሰቡ በድጋሚ እንዲመረጡ ፍላጎት አላት።

በተጨማሪም ፈረንሳይ ፣ ኦስትሪያ ፣ ፖርቱጋል እና ስፔን ለዶ/ር ቴዎድሮስ ድጋፍ የሰጡ ሌሎች የአውሮፓ ሃገራት መሆናቸው ተዘግቧል።

ይህ የእውነታ ማጣራት በአዲስ ሚዲያና ኮድ ፎር አፍሪካ ትብብር የቀረበ