በጅማ አባ ጅፋር አውሮፕላን ማረፊያ ምንነቱ ያልታወቀ ፍንዳታ ተሰምቷል፤ በረራዎችም ተቋርጠዋል የሚሉ መረጃዎች መሰራጨታቸውን ተከትሎ የትራንስፖርት ሚኒስቴር እና የኢትዮጵያ አየር መንገድ ምላሽ ሰጥተዋል።
“Eliassudan” የተባለ የቲውተር አካውንት በጅማ ኤርፖርት ፍንዳታ መከሰቱን ይሄንን ተከትሎ ወደ ከተማው የሚደረጉ በረራዎች መራዘማቸውን የሚገልጽ መረጃ አጋርቷል።
በሌላ በኩል “Sajid Nadeem” የተባለ የ”ጂኦ ፖለቲካ ተንታኝ” በቲውተር ገጹ በኩል በቪዲዮ በመቅረብ በጅማ አባ ጅፋር አውሮፕላን ማረፊያ ምንነቱ ያልታወቀ ፍንዳታ መሰማቱን በዚህም ሳቢያ የሁለት ሰዎች ህይወት ማለፉን የሚገልጽ መረጃ አጋርቷል።
ግለሰቦቹ መረጃውን ከማጋራት ውጪ በምስልም ሆነ በቪዲዮ ማረጋገጫ አላቀረቡም።
ከላይ የተገለጹት መረጃዎች መሰራጨታቸውን ተከትሎ የትራንስፖርት ሚኒስቴር እና የኢትዮጵያ አየር መንገድ ምላሽ ሰጥተዋል።
የትራንስፖርት ሚኒስቴር ሚኒስትር ዴኤታው አቶ ካሳሁን ጎፌ “አውሮፕላን ማረፊያው አገልግሎት እየሰጠ ነው ፥ የደረሰ አደጋ የለም ሲሉ መናገራቸው ተዘግቧል።
በተጨማሪም የኢትዮጵያ አየር መንገድ በይፋዊ የፌስቡክ ገጹ በኩል “መረጃ ፍጹም ሐሰት ነው” ሲል አስተባብሏል።
አዲስ ሚዲያ ከኮድ ፎር አፍሪካ ጋር በመተባበር ባደረገው ተጨማሪ የማጣራት ስራ ከታች በምስሉ ላይ እንደሚታየው በዛሬው እለት ማለትም መስከረም 17፣ 2014 ዓ.ም (September 27, 2021) ከአዲስ አበባ – ጅማ እንዲሁም ከጅማ – አዲስ አበባ በረራዎች መኖራቸውን አረጋግጧል።
በተመሳሳይ በረራ እንደተቋረጠ በተገለጸበት በመስከረም 16 ፣ 2014 ዓ.ም (September 26, 2014) የጅማ አባጅፋር አውሮፕላን ማረፊያ በረራዎችን ማስተናገዱን የበረራ መከታተያ ድረገጽ የሆነው “flights stats” አረጋግጧል።
